Lev 17 | NdeIBE | STEP | UJehova wathi kuMosi,

Leviticus 17

Ukudla igazi kuyalelwa

1 UJehova wathi kuMosi, 2 “Tshela u-Aroni lamadodana akhe labobonke abako-Israyeli ukuthi: ‘Nanku okutshiwo nguJehova:

3 Loba nguwuphi owako-Israyeli ozakwenza umhlatshelo ngenkabi, izinyane lemvu loba imbuzi ezihonqweni loba ngaphandle kwazo

4 esikhundleni sokuyiletha esangweni leThente lokuHlanganela ukuyethula ibe ngumnikelo kuJehova phambi kwethabanikeli likaJehova – leyondoda izakuba lecala lokuchitha igazi; usechithe igazi ngakho kumele axotshwe ebantwini bakibo. 5 Lokhu kuzakwenza abako-Israyeli balethe kuJehova imihlatshelo le abayenzela egangeni. Kabayilethe kumphristi, lokhu kuyikuthi, kuJehova, esangweni leThente lokuHlanganela njalo banikele njengeminikelo yobudlelwano. 6 Umphristi kachele i-alithare likaJehova ngegazi esangweni leThente lokuHlanganela atshise amahwahwa njengoqhatshi oluthokozisayo kuJehova.

7 Bangabe besanikela loba yiwuphi umnikelo kubonkulunkulu babo bezimbuzi labo ababaxhwalisayo. Lesi siyisimiso sabo esingapheliyo lakuzizukulwane ezizayo.’

8 “Wothi kubo: ‘Loba nguwuphi owako-Israyeli loba owezizwe ohlezi labo onikela umnikelo wokutshiswa loba umhlatshelo

9 kodwa engakulethi esangweni leThente lokuHlanganela ukuba ahlabele kuJehova – lowo muntu kaxotshwe ebantwini bakibo.

10 “ ‘Loba nguwuphi owako-Israyeli loba owezizwe ohlala phakathi kwabo ozakudla loba yiliphi igazi – ngizamelana laye odla igazi ngimxotshe phakathi kwabantu bakibo.

11 “Ngoba impilo yesidalwa isegazini, njalo ngiliphile ukuthi lenze ukubuyisana kwenu ealithareni; kuligazi elenze ukubuyisana empilweni yomuntu. 12 Ngakho ngithi kwabako-Israyeli, “Kakho phakathi kwenu ozakudla igazi, loba owezizwe ohlala phakathi kwenu ozakudla igazi.”

13 “ ‘Loba nguwuphi owako-Israyeli loba owezizwe ohlala phakathi kwenu ozingela loba yiphi inyamazana loba edliwayo kavuzise igazi aligqibele ngenhlabathi, 14 ngoba impilo yesidalwa isegazini laso. Yikho ngithe kwabako-Israyeli, “Lingabokudla igazi laloba yisiphi isidalwa, ngoba impilo yesidalwa sonke ligazi laso; loba ngubani olidlayo kaxotshwe.”

15 “ ‘Loba ngubani, kumbe umninindawo loba owezizwe, ozakudla loba kuyini okufunyanwe kufile loba okubulewe yizinyamazana zeganga kagezise izigqoko zakhe kanye lomzimba wakhe ngamanzi, uzakuba ngongcolileyo ngokomkhuba kuze kuhlwe; uzakuba esehlambulukile. 16 Kodwa nxa engagezisi izigqoko zakhe lokugeza umzimba wakhe, uzakuba lecala.’ ”